சூர்யா சேதுபதி ஹீரோவாக அறிமுகமாகும் பீனிக்ஸ் - ஜூலை 4-ல் வெளியீடு

பீனிக்ஸ் படத்தின் "இந்தா வாங்கிக்கோ" 2-வது பாடல் வெளியானது

AK பிரேவ்மேன் பிக்சர்ஸ் வழங்கும் பீனிக்ஸ் திரைப்படம் மூலம் மக்கள் செல்வன் விஜய் சேதுபதியின் மகன் சூர்யா சேதுபதி ஹீரோவாக அறிமுகமாகிறார். ஆக்ஷன் கதைக்களத்தின் பின்னணியில் உருவாகி இருக்கும் பீனிக்ஸ் திரைப்படம் வருகிற ஜூலை 4-ம் தேதி திரையரங்குகளில் பிரமாண்டமாக வெளியாகிறது.

பிரபல ஸ்டண்ட் மாஸ்டர் அனல் அரசு இயக்கத்தில் உருவாகி இருக்கும் பீனிக்ஸ் திரைப்படத்தில் இசையமைப்பாளர் சாம் சி.எஸ்., ஒளிப்பதிவு வேல்ராஜ் மற்றும் படத்தொகுப்பு பிரவீன் கே.எல். என முன்னணி தொழில்நுட்ப கலைஞர்கள் பணியாற்றி உள்ளனர். அதிரடி சண்டை காட்சிகள் மட்டுமின்றி இந்தப் படத்தில் எமோஷனல் கதையம்சமும் கொண்டிருக்கிறது.

கதாநாயகனாக இது முதல் திரைப்படம் என்றாலும் ஏற்கனவே நானும் ரௌடி தான் மற்றும் சிந்துபாத் போன்ற படங்களில் சூர்யா நடித்துள்ளார். எனினும், பீனிக்ஸ் திரைப்படம் மூலம் அவர் படம் முழுக்க வரும் கதாபாத்திரம் ஏற்று நடித்துள்ளார். இந்தப் படத்தின் மூலம் அவர் தன்னை முழுநேர நடிகராக பரிணமித்துக் கொள்ளும் முயற்சியில் இறங்கியுள்ளார்.

தற்போது பீனிக்ஸ் படத்தின் இரண்டாவது பாடல், "இந்தா வாங்கிக்கோ" இன்று வெளியாகி இருக்கிறது. பண்டிகை பின்னணியில் உருவாகி இருக்கும் இந்த குத்துப் பாடலுக்கு சாம் சி.எஸ். இசையமைக்க, பாபா பாஸ்கர் நடன ஒளிப்பதிவு செய்திருக்கிறார். இந்தப் பாடலுக்காக வேல்ராஜ் பதிவு செய்துள்ள காட்சிகளில் சூர்யாவின் நடனம் ஏற்கனவே இணையத்தில் பாராட்டை பெற்று வருகிறது.

தனது மகனை பெரிய திரையில் அறிமுகமாக தன் தரப்பு ஆதரவை வெளிப்படுத்தும் வகையில், இந்தப் பாடலை நடிகர் விஜய் சேதுபதி வெளியிட்டுள்ளார்.

பலம் பொருந்திய தொழில்நுட்ப குழுவுடன் ஹீரோவாக அறிமுகமாகும் சூர்யா சேதுபதி தனது பெயர் மட்டுமின்றி கதையம்சத்திலும் உறுதியான நோக்கத்துடன் களமிறங்குகிறார். பீனிக்ஸ் மூலம் அறிமுகம் மட்டுமின்றி தமிழ் திரையுலகின் நம்பிக்கைக்குரிய நாயகனாக வலம் வர இருக்கிறார்.